საცივი

ინგრედიენტები:
დიდი ქვაბი საცივისთვის:
ინდაური ან ქათამი 2კგ
ნიგოზი 500გრ
ნიორი 7კბილი
ხახვი 1ც
კვერცხის გული 3ც
წითელი წიწაკა 1ჩ/კ
საცივის სუნელები: ხმელი ქინძი + უცხო სუნელი(ერთი ერთზე) 2ჩ/კ
ზაფრანა(ყვითელი ყვავილი) 1ჩ/კ
ღვინის ძმარი ½ ს/კ
მარილი გემოვნებით
მომზადების წესი:
ნიგოზი უნდა იყოს არა ყავისფერი, არამედ ნათელი, ღია ფერის(როგორც ფოტოზეა).

ტრადიციულ საცივში გამოიყენება ინდაური, მაგრამ დღესდღეობით ბევრი აკეთებს ქათმით. ქათამს დაასხით 2ლ წყალი და ხარშეთ დაბალ ცეცხლზე 50-60წუთის მანძილზე. შემდეგ ამოვიღოთ ქათამი, დავდოთ ჟარონაზე მკერდით ქვევით და შევწვათ ღუმელში. რომ შეიწვება ქათამი დავჭრათ საშუალო ზომის ნაჭრებად.

გავატაროთ ნიგოზი ხორცის გასატარებელი მანქანაში ან დავაბლენდეროთ ან დავნაყოთ ქვასანაყში, მთავარია რაც შეიძლება ერთგვაროვანი იყოს მიღებული მასა, არ ქონდეს შერეული მსხვილი ნატეხები, თუ ასეთ ეფექტს ვერ მიიღებთ პირველ ჯერზე გაატარეთ/დააბლენდერეთ ნიგოზი მეორედაც.   დავამატოთ ნიგოზს დაჭყლეტილი ნიორი, ზაფრანა, ქინძი, და  წითელი წიწაკა. ასევე წვრილად დაჭრილი მოთუშული ხახვი. ყველაფერი კარგად ავურიოთ ერთმანეთში.

გატარებული ნიგვზიდან აიღეთ 3ს/კ ნიგოზი და კიდევ გაატარეთ სამჯერ, გამოწურეთ ხელის გულებით ნიგვზიდან ზეთი ცალკე ჭურჭელში, კიდევ გაატარეთ 2-ჯერ და კიდევ გაწურეთ, ასევე შეაგროვეთ გასატარებელიდან ჩამოსული ნიგვზის ზეთი. შემდეგ ნიგვზის ეს მასა ისევ შეურიეთ გატარებული ნიგვზის დანარჩენ მასა.

დავამატოთ ნიგვზიან მასას კვერცხის გულები და კარგად მოვურიოთ შემდეგ მიღებულ მასას დავასხათ იმდენი ბულიონი, რომ მივიღოთ ერთგვაროვანი კონსისტენციის სქელი არაჟნისებრი მასა.

მიღებული ნიგვზიანი მასა 3-4ჯერ გავატაროთ საცერში, რის შედეგადაც მიიღებთ საკმაოდ თხელ ნიგვზიან მასას, საცერზე დარჩენილი ნიგვზის სქელი ნაწილები შეგიძლიათ გადაყაროთ.

დავდგათ სოუსიანი ქვაბი ცეცხლზე და გადმოვდგათ მაშინვე, როგორც კი ზედაპირზე პირველი ბუშტუკები გამოჩნდება, რომ გაცივდება დავამატოთ მარილი და ძმარი გემოვნებით. არ ჩაასხათ ძმარი ცხელ მასაში, რადგან მასა შეიძლება გამუქდეს.

კერძი რომ გაცივდება თავზე მოასხით ნიგვზის ზეთი…